Үндістанда су тасқынынан 1,6 миллионнан астам адам зардап шекті

Үндістанның Бихар штатында су тасқынына байланысты жағдай күрделі болып отыр. Табиғи апат 11 округті қамтып, 1 миллион 685 мыңнан астам адамға әсер етті.

Зардап шеккен аудандарда тұрғындарға көмек көрсету және қауіпсіз жерге көшіру жұмыстары жүргізіліп жатыр. Құтқару операцияларына 1 158 қайық пен төтенше жағдайларға ден қою жөніндегі 34 топ тартылды.

Тұрғындарды қажетті азық-түлікпен қамтамасыз ету үшін өңірде 80 тамақтану пункті ұйымдастырылды. Сонымен қатар қауіпсіздік мақсатында 326 адам уақытша орналастыру орындарына эвакуацияланды.

Жергілікті билік су деңгейінің қайта көтерілу ықтималдығына байланысты ахуалды тұрақты бақылауда ұстап отыр. Құтқару қызметтері тұрғындарға қажетті көмек көрсетіп, қауіп төнген аймақтардан адамдарды эвакуациялауды жалғастыруда.