Алматыда дәрігерлер баланың ішегінен 59 магнит шығарды

Алматыда бір күн ішінде магнит жұтып қойған үш бала ауруханаға жеткізілген. Олардың жасы екі мен төрт жас аралығында.

Екі жастағы баланың асқазанынан 25 магнит алынған. Бөгде заттар асқазан қабырғасын тесіп кеткен.

Тағы бір баланың ішегінен 9 магнит шығарылды. Баланың жағдайы асқынып, перитонит дамыған.

Ең күрделі жағдай төрт жасқа толмаған балада тіркелді. Операция кезінде оның жіңішке ішегінен 59 магнит алынды. Магниттер ішек қабырғасын зақымдап, тесіп үлгерген.

Дәрігерлер ата-аналарды балалардың ұсақ заттармен ойнауына мұқият бақылау жасауға шақырады. Бірнеше магнитті қатар жұту ішектің қысылуына, қабырғасының зақымдалуына және ауыр асқынуларға әкелуі мүмкін.