Алаяқтар несие рәсімдеудің жаңа тәсіліне көшті

Қазақстанда интернет-алаяқтықтың несиеге байланысты жаңа схемалары таралып жатыр. Бұл туралы Қаржы нарығын реттеу және дамыту агенттігі ескертті.

Мамандардың мәліметінше, алаяқтар азаматтардың сеніміне кіріп, психологиялық тәсілдер арқылы оларды өз бетінше несие рәсімдеуге итермелейді. Мұндай жағдайда қаскөйлер жәбірленушінің атына қашықтан қарыз рәсімдеуге қол жеткізеді.

Әлеуметтік инженерия кезінде алаяқтар банк қызметкері, құқық қорғау органдарының өкілі немесе басқа да ұйымдардың маманы ретінде танысуы мүмкін. Олар шұғыл әрекет ету қажеттігін айтып, азаматты несие алуға немесе қаражатын басқа шотқа аударуға көндіреді.

Қаржы нарығын реттеу және дамыту агенттігі бейтаныс адамдардың нұсқауымен несие рәсімдемеуге және жеке мәліметтерді бермеуге шақырды. Сондай-ақ күмәнді қоңыраулар немесе хабарламалар түскен жағдайда ақпаратты ресми арналар арқылы тексеру қажет.

Мамандар азаматтарға банк картасының деректері, SMS-кодтар, жеке сәйкестендіру мәліметтері мен мобильді қосымшалардағы құпия ақпаратты бөгде адамдарға бермеуді ұсынады.