Шанхайда өндіріс үшін AI мамандары даярланады

Қытайдың Шанхай қаласында «3+3+3» бағдарламасы іске қосылып, жасанды интеллектіні нақты экономикада қолдана алатын инженерлерді даярлауға басымдық берілді.

Жобаға мемлекеттік кәсіпорындардың басшылары, инженерлер мен жоғары оқу орындарының студенттері қатысады. Бағдарлама мамандарға жасанды интеллект алгоритмдерін өндірістік процестерге бейімдеуді үйретуге бағытталған.

Қазірдің өзінде бірқатар кәсіпорында технологияның тиімділігі байқалып отыр. Jincheng Technology компаниясының мамандары өндірістің әртүрлі бағыттарында ондаған AI жобасын жүзеге асырған.

Chuanning Biotechnology компаниясында жасанды интеллект ферментация процестерін бақылау және болжау үшін қолданылады. Жүйенің болжам дәлдігі 99,9 пайызға жетіп, кәсіпорынның өндіріс көлемі бір айда 5 пайызға өскен.

Ал Shiyuan Technology өндірістік жабдықтарды қайта баптау уақытын бірнеше сағаттан 55 секундқа дейін қысқартқан.

Zhenhua Heavy Industries дәнекерлеу кезінде пайда болатын ақауларды автоматты түрде анықтайтын жасанды интеллект жүйесін әзірлеп жатыр.

Жаңа бағдарлама арқылы Шанхай өндірісте AI технологияларын қолданатын мамандар санын арттырып, цифрлық шешімдерді нақты кәсіпорындарға енгізуді көздеп отыр.