«Астана Опера» Бельгияның жетекші опера театрымен бірлескен жобаларды жүзеге асырады

21 қыркүйекте Брюссельде «Астана Опера» театрының Басқарма төрағасы Александр Совостьянов La Monnaie – De Munt театрының бас әрі көркемдік директоры Кристина Шеппельманнмен кездесті. Кездесуге Қазақстанның Бельгиядағы Елшісі Роман Василенко да қатысты.

Кездесу Қазақстан мен Бельгия арасындағы мәдени байланыстарды кеңейту және қазақстандық өнерді еуропалық сахнада таныту мақсатында Қазақстанның Бельгиядағы Елшілігінің қолдауымен ұйымдастырылды.

Тараптар екі театр арасындағы тікелей кәсіби байланысты нығайту және жаңа шығармашылық жобаларды бірлесіп жүзеге асыру мүмкіндіктерін талқылады. Ынтымақтастықтың негізгі бағыттары ретінде гастрольдік сапарлар ұйымдастыру, әртістер мен театр мамандары арасында тәжірибе алмасу, сондай-ақ еуропалық көрерменді қазақстандық опера және балет өнерімен таныстыру мәселелері қаралды.

Кездесуде «Астана Опера» театрының даму қарқынына да ерекше назар аударылды. Театр ашылғаннан бері қысқа уақыт ішінде ауқымды репертуар қалыптастырып, бірқатар ірі қойылымдарды сахналады. Сонымен қатар әлемдік опера және балет өнерінің жетекші өкілдерімен халықаралық шығармашылық байланыстар орнатты.

La Monnaie – De Munt театрының бас әрі көркемдік директоры Кристина Шеппельманн қазақстандық театрдың шығармашылық әлеуетін жоғары бағалады. Оның айтуынша, Қазақстанның опера және балет өнері өзіндік ерекшелігімен еуропалық көрерменге қызықты болуы мүмкін.

Өз кезегінде Александр Совостьянов екі театр арасындағы тұрақты кәсіби байланысты дамытуға мүдделі екенін атап өтті. Оның пікірінше, бірлескен жобалар шығармашылық тәжірибе алмасуға және Қазақстан мен Бельгия арасындағы мәдени диалогты одан әрі кеңейтуге мүмкіндік береді.

Қазақстанның Бельгиядағы Елшісі Роман Василенко да екі елдің жетекші мәдени мекемелері арасында тікелей байланыс орнатудың маңыздылығын атап өтті. Оның айтуынша, мұндай ынтымақтастық Қазақстанның заманауи мәдениеті мен музыкалық мұрасын еуропалық аудиторияға кеңінен таныстыруға жол ашады.

La Monnaie – De Munt Брюссель қаласының орталығында орналасқан және Бельгия мен Еуропадағы танымал опера театрларының бірі саналады. 2025 жылдың шілдесінен бастап театрды Кристина Шеппельманн бас әрі көркемдік директор ретінде басқарып келеді.