Астанада екінші әуежай салу жоспарланып отыр

Астана қаласының әкімдігі, Қазақстанның Көлік министрлігі және Changi Airports International (CAI) компаниясы елордадағы әуежай инфрақұрылымын дамыту бойынша ынтымақтастық туралы негіздемелік келісімге қол қойды.

Жоспарға сәйкес, CAI Астанадағы жаңа әуежай жобасына қатысады. Компания Сингапурдың Changi Airport Group құрамына кіреді және әуежайларды дамыту мен басқару бағытында жұмыс істейді.

Сонымен қатар тараптар қазіргі Астана халықаралық әуежайын дамыту бойынша да бірлескен жұмыс жүргізуге келісті.

Changi Airports International компаниясының қолданыстағы әуежайдың басқару жүйесіне, операциялық қызметіне және оны одан әрі дамытуға қатысуы қарастырылып отыр.

Жаңа әуежайдың құрылысы елордадағы әуе тасымалы инфрақұрылымын кеңейтуге бағытталған. Жобаның нақты орналасқан жері, құрылыс мерзімі және техникалық сипаттамалары туралы қосымша ақпарат кейінірек жариялануы мүмкін.