Өмірзақ Шөкеев ҰОС ардагерлерін құттықтады

Аймақ басшысы әуелі Ұлы Отан соғыс ардагері Әбжаппар Дайрабайұлының шаңырағына аялдады. Ол 1927 жылы 1 қаңтарда Сыр бойындағы Тартоғай ауылында дүниеге келген. Әбжаппар ата 1943 жылы майданға алынып, Беларусь, Украина майдандарында Польшаны азат етуге қатысқан. Ол «Ұлы Отан соғысы» орденімен, «Ерен еңбегі үшін» медалімен марапатталған. Елге оралғаннан кейін ұстаздық жолда еңбек еткен. Ардагер 3 қыз бен 2 ұлдан 6 немере сүйіп отыр.

Одан кейін облыс әкімі Ұлы Отан соғыс ардагері Немет Абдрасиловтың шаңырағында болды. Ол 1922 жылы 1 қаңтарда Түркістан қаласында дүниеге келіп, 1-гвардиялық артиллериялық дивизия құрамында нысанашы, зеңбірек командирі болған. Украина, Белоруссия майдандары мен Сталинград, Курск шайқастарына қатысқан. І дәрежелі Отан соғысы, ІІ және ІІІ дәрежелі Даңқ ордендерімен, екі Қызыл Жұлдыз орденімен, «Германияны жеңгені үшін», «Берлинді алғаны үшін», «Варшаваны азат еткені үшін» секілді медальдармен марапатталған.  Ардагер 5 ұл мен 1 қыздан 20 немере, 18 шөбере сүйіп отыр.

Өңір басшысы Өмірзақ Естайұлы ардагерлердің соғыста көрсеткен ерлігін бүгінгі ұрпақтың қамы үшін жасалғандығын айтып, мерекемен құттықтап, сый-сыяпат жасады. Ардагерлерге деннің саулығын, ғұмырдың ұзақтығын тіледі.

Айта кететін жайт, Түркістан облысы бойынша Ұлы Отан соғысы ардагерлері және оларға теңестірілгендер саны – 12 849, соның ішінде 63-і соғысқа қатысушылар мен мүгедектер, 3-і қаза тапқан жауынгерлердің жарлары және 9445-і тыл ардагерлері бар.

Ұлы Жеңіс мерекесі қарсаңында барлық аудандар мен қалаларда жергілікті бюджеттер есебінен Ұлы Отан соғысына қатысушыларға 100 айлық есептік көрсеткіш мөлшерінде, яғни 252 500 мың теңгеден, оларға теңестірілген азаматтарға 5 АЕК (12 625 теңге) мөлшерінде біржолғы материалдық көмек берілетін болады.