«Тең мүмкіндіктер»: БҚО-да инклюзивті спорт фестивалі өтті

Фестивальді «Әділет» партиясының Батыс Қазақстан облыстық филиалы мен облыстық білім басқармасы ұйымдастырды. Жарысқа 9 команда қатысып, оның құрамында ерекше қажеттіліктері бар 56 бала өнер көрсетті.

Қатысушылар бочча, жеңіл атлетика және «Көңілді старттар» эстафетасы бойынша бақ сынады. Балалар спорттағы қабілеттерін көрсетіп, командалық бірлік пен өзара қолдаудың маңызын танытты.

«Әділет» партиясы БҚО филиалының жетекшісі Бауыржан Бектұрған инклюзивті спорттың балалардың өзіне деген сенімін арттырып, жаңа достар табуына мүмкіндік беретінін атап өтті.

Фестивальдің негізгі мақсаты – балаларды спорт арқылы біріктіру, әр адамның қабілеті мен мүмкіндігіне құрметпен қарауды қалыптастыру және қоғамда өзара қолдау мәдениетін дамыту.

Шара соңында үздік командалар мен қатысушылар марапатталды. Облыстық кезең жеңімпазы «Тең мүмкіндіктер» фестивалінің республикалық кезеңіне жолдама алды.