Қанат Ниязбеков ұсталды

Бұл туралы Ішкі істер министрлігі мәлімдеді.

Министрліктің мәліметінше, қазір Каспий теңізіндегі оқу-жаттығу кезінде әскери қызметкерлердің қаза табуына байланысты қылмыстық іс тергеліп жатыр.

Тергеу аясында Қазақстан Қарулы күштері Әскери-теңіз күштерінің бұрынғы бас қолбасшысы, 1-дәрежелі капитан Қанат Ниязбеков қызметіне салғырт қарады деген күдікпен ұсталды.

Ол уақытша ұстау изоляторына қамалды. Қазір тергеу барысында оқиғаның мән-жайы, әскери оқу-жаттығуды ұйымдастыру мен өткізу кезінде жауапты тұлғалардың әрекеті тексеріліп жатыр.

Бұған дейін Каспий теңізіндегі қайғылы жағдайға байланысты Қорғаныс министрлігінің бес лауазымды қызметкері ұсталған еді.

Қылмыстық іс бойынша тергеу жалғасып жатыр.