Алматыда 594 пәтерге 5 пайыздық ипотекаға өтінім қабылдау басталады

Пәтерлер Наурызбай ауданындағы Достық шағынауданында, Ілтипат көшесі, 42а мекенжайында орналасқан. Сәуірде пайдалануға берілген үйлерді Алматы әкімдігі салған.

Бір шаршы метрдің бағасы әрленген күйінде 359 мың теңге болады. Бір бөлмелі пәтерлер шамамен 13 миллион, екі бөлмелі пәтерлер 19 миллион, ал үш бөлмелі пәтерлер 22 миллион теңгеден асады.

Барлығы 594 пәтер бөлінеді: 184-і — бір бөлмелі, 248-і — екі бөлмелі, 162-сі — үш бөлмелі. Олардың ең үлкен ауданы тиісінше 37,4, 61,6 және 78,5 шаршы метр.

Қатысушыларды іріктеу 3 қарашада аяқталады. Өтінімдерді Otbasybank.kz жылжымайтын мүлік порталында 10439 нысан коды бойынша беруге болады. Үміткерлер кезекке тұрған күніне қарай іріктеледі, күндері бірдей болса, өтінімнің порталға жіберілген уақыты ескеріледі.

Пәтерлердің 70 пайызы басым санаттарға бөлінеді. Оларға соғыс және басқа мемлекеттер аумағындағы ұрыс қимылдарының ардагерлері, I және II топтағы мүгедектігі бар адамдар, мүгедектігі бар балаларды тәрбиелеп отырған отбасылар, жесірлер, көпбалалы отбасылар мен жетім балалар жатады. Қалған 30 пайызы өзге кезекте тұрғандарға беріледі. Бұл санаттағы үміткерлердің Отбасы банктегі депозитінде қарыз сомасының кемінде 10 пайызы болуы керек.