Қазақстанда дүкендер мен онлайн алаңдарға жаңа талаптар енгізілді

Қазақстанда азық-түлікке жатпайтын тауарлар да отандық өнімге арналған сөре үлесі талабына қосылды. Енді сауда орындары бұл көрсеткішті әр тауар санаты мен қосалқы санаты бойынша жеке есептеп, қазақстандық өнімге кемінде 30% бөлуі керек. Есептеуде сатып алушыға тауардың алдыңғы беті көрініп тұрған бірліктер саны ескеріледі.

Бірінші-төртінші санаттағы дүкендер отандық тауарларды «Қазақстанда жасалған» деген жазумен белгілеуге тиіс. Өнімдер әр санаттың орталық тұсына, сатып алушының көз деңгейіне қойылады. Отандық тауар жеткіліксіз болған жағдайда бос орынды басқа өніммен толтыруға рұқсат етіледі.

Маркетплейстер іздеу нәтижесін қалыптастырғанда «Қазақстанда жасалған» белгісі бар тауарларға басымдық береді. Бұл талап пайдаланушының жеке параметрлеріне негізделген іздеу нәтижелеріне қолданылмайды. Сондай-ақ алаңдар сатушылармен жасалатын шартқа электрондық сауда талаптарын сақтау туралы міндетті енгізуі керек.

Хабарландыру сайттары жарнама берушілерді тіркеп, екі факторлы аутентификация арқылы сәйкестендіруге міндеттелді. Жылжымайтын мүлікті сату, жалға беру немесе өзге жолмен иеліктен шығару туралы хабарландыруда нысанның апатты не тозған деп танылған-танылмағаны көрсетілуі қажет. Алаңдардың бағдарламалық қамтамасы Ұлттық банктің антифрод орталығымен біріктіріледі.

Жаңартылған қағидалар әлеуметтік маңызы бар азық-түлік тауарларына сауда үстемесінің шекті мөлшерін 15% деңгейінде белгілейді. Ол өндірушінің сату бағасынан немесе шартта көрсетілген көтерме жеткізушінің сатып алу бағасынан есептеледі. Бір тауар бірнеше жеткізушіден келсе, ең төмен шарттық баға негізге алынады; құжатпен расталған тасымалдау, импорт және электрондық сауда кезіндегі жеткізу шығындарын бөлек есептеуге болады.