Трамп командасы Зеленскийді Ресей шарттарымен келісімге мәжбүрлемек

Басылымның жазуынша, Трамптың Ресеймен келісім жасауға ұмтылысы оның Украинаға наразылығын күшейтіп отыр. Мақалада АҚШ президентінің Ресейге жаңа баж салығын енгізуді көздеген екі партиялы заң жобасын кейінге ысырып, Мәскеуден дизель отынын сатып алу туралы келісім жасағаны және «Лукойл» активтерінің едәуір бөлігін сатып алу жөніндегі келісімнің негізгі шарттары келісілгені айтылған.

Сондай-ақ Трамптың Владимир Зеленскийді қызметтен кетіруге шақырғаны, ал Украина президентінің соғыс қимылдарын Ресей аумағына көшіре алғаны АҚШ басшысының наразылығын туғызғаны жазылған. Басылымның бағалауынша, Трамп Зеленскийді келісімге келуге мәжбүрлемек. Ол Украинаның шығысындағы басып алынған аумақтарды ұстап қалуға тырысу нәтижесіз болуы мүмкін екенін аңғартып, Ресей шарттары басым келісімге қарсылық білдірмеген жағдайда Киевке қаржылай пайда түсуі мүмкін екенін алға тартады.

Сейсенбіде Ослода Зеленскийдің Трамптың арнайы өкілі Стив Уиткоффпен кездесуі күтілуде. Норвегия үкіметінің мәліметінше, Трамптың күйеу баласы Джаред Кушнер де келіссөзге қашықтан қатысады. Кездесуге Норвегия премьер-министрі Йонас Гар Стере мен Финляндия президенті Александр Стубб те қатысады.

Келесі күні Уиткофф пен Кушнер Санкт-Петербургке барып, Владимир Путинмен кездеседі деп күтілуде. Мақалада АҚШ өкілдерінің осы кездесуде ұзақ уақыттан бері қамауда отырған америкалық азаматты босатуға күш салатыны жазылған.