Қазақстан армиясында әскери реформаның жоспары іске асырыла бастады

Әскери реформаның жоспары Қауіпсіздік кеңесінің президент Қасым-Жомарт Тоқаев төрағалық еткен отырысында мақұлданды. Мемлекет басшысы заманауи, ұтқыр әрі технологиялық армия құруды, қызмет қауіпсіздігіне, қолбасшылық мәдениетіне және мемлекеттік ресурстарды тиімді пайдалануға мән беруді тапсырды.

Мерзімді әскери қызметті екі кезеңге бөлу жоспарланған: алғашқы алты айда бір шақырылымдағы сарбаздар оқу орталықтарында әскери білім алып, қызметке бейімделіп, дене дайындығын шыңдайды. Сонымен қатар азаматтық жұмысшы мамандықтарын меңгеріп, тіл үйреніп, жасанды интеллектіні қолдану дағдыларын дамыта алады. Келесі алты айда олар әскери бөлімдерде қызмет етіп, бөлімшелер құрамында тапсырмалар орындайды.

Мұндай тәсілдің жекелеген бөліктері Sarbaz+ жобасы аясында сыналған. Екі кезеңді қызметтің пилоттық жобасын 2027 жылы іске қосу жоспарланған. Әскери қызметшілердің құқықтарын қорғау үшін әскери бөлім қолбасшылығына тәуелсіз кеңесшілер институты құрылмақ: олар заң бұзушылықтарды анықтауға, сарбаздарға қолдау көрсетуге және заңды мүдделерін қорғауға көмектеседі.

Реформа Қарулы күштердің құрылымы мен құрамын, қорғанысты жоспарлауды, жұмылдыру дайындығын және резерв жасақтау жүйесін де қамтиды. Әскерді технологиялық тұрғыдан жаңарту отандық қорғаныс өндірісін, ұшқышсыз жүйелер мен оларға қарсы құралдарды дамытуды, жасанды интеллект пен цифрлық шешімдерді енгізуді көздейді. Жауынгерлік іс-қимылды модельдейтін симуляциялық бағдарламалар оқу сапасын арттырып, жаттығу шығындарын азайтуға тиіс.

2027 жылдан бастап «Жас Қыран», «Жас Ұлан» және «Жас Сарбаз» кезеңдерін біріктіретін «Жас айбын» бірыңғай әскери-патриоттық даярлық жүйесін құру жоспарланған. Мектептерде қауіпсіз жүріс-тұрыс, алғашқы көмек және төтенше жағдай кезіндегі әрекет үйретіледі. Жоспардағы ұйымдастыру шараларын жыл соңына дейін аяқтау көзделген, ал негізгі өзгерістер орта мерзімге есептелген.