Габон жағалауында 115 адам болған бұрғылау платформасы суға батты

Оқиға 24 қазанда жергілікті уақыт бойынша сағат 20:37 шамасында болды. Borr Drilling компаниясына тиесілі Prospector 5 платформасы BW Energy мұнай-газ компаниясына арнап бұрғылау жұмыстарына әзірленіп жатқан. Алдын ала мәлімет бойынша, жүктемені тексеру кезінде қондырғының тірегі шөгіп, платформа тепе-теңдігін жоғалтып, суға кеткен.

Borr Drilling шұғыл әрекет ету тобын жұмылдырған. Жоғалған бес адамды компания жергілікті билік органдарымен және BW Energy-мен бірлесіп іздеп жатыр. Апаттан кейін кен орнындағы мұнай өндіру уақытша тоқтатылды. Жобаның 17,5 пайызына иелік ететін Panoro Energy өндірістік нысандардың зақымданғаны немесе ағып кету туралы хабарлама түспегенін мәлімдеді.