Испанияда пойыздар соқтығысып, кемінде 30 адам қаза тапты

Кастилия-Ла-Манча аймақтық үкіметінің мәліметінше, апаттан кемінде 30 адам қаза тапқан. Бұған дейін билік 10 адамның көз жұмғанын хабарлап, құрбандар саны көбеюі ықтимал екенін айтқан.

Renfe және Iryo компанияларының пойыздары Мадридтен оңтүстікке қарай шамамен 140 шақырым жердегі Урда қаласының маңында таңғы сағат 9-дан кейін соқтығысқан. Iryo пойызының кемінде екі вагоны аударылып, теміржол үйіндісінен құлаған. Екі пойызда 500-ден астам жолаушы болған.

Теміржол инфрақұрылымының операторы Adif Мадрид — Андалусия бағытындағы жоғары жылдамдықты желіде қозғалыс тоқтатылғанын хабарлады. Испания премьер-министрі Педро Санчес оқиға орнында төтенше қызметтер жұмыс істеп жатқанын мәлімдеп, зардап шеккендер мен олардың жақындарына көңіл айтты.