Испанияда пойыз апатына дейінгі машинистер мен диспетчерлердің сөйлесулері жарияланды

Испандық БАҚ Мадридтен Севильяға бет алған жоғары жылдамдықты пойыздың жолда тұрған Iryo құрамымен соқтығысуына дейінгі диспетчерлер мен машинистердің сөйлесулерін жариялады. Апат болған сәтте Renfe мемлекеттік компаниясының пойызында 397, ал жеке Iryo компаниясының құрамында 147 жолаушы болған.

Алдын ала мәлімет бойынша, автоматты сигнал беру жүйесіндегі ақаудан зардап шеккен учаскедегі пойыздар тоқтаған. Испанияның көлік министрі Оскар Пуэнте кейін Renfe пойызына қозғалысты жалғастыру туралы бұйрық «қателесіп» берілгенін айтты. Жазбада диспетчер машинистке LZB жүйесін өшіріп-қосуды ұсынып, қозғалысты әдеттегі жылдамдықпен жалғастыруды тапсырғаны естіледі.

Iryo пойызының машинисі диспетчерге құрамның Урда стансасындағы кіреберіс бағдаршам алдында тоқтап тұрғанын және пойызды басқару жүйесімен байланыс үзілгенін хабарлаған. Кейін ол пойызды әлі қозғалысқа келтіре алмағанын айтқан. Жазбаларға сәйкес, Renfe пойызына қозғалысты жалғастыруға 8:36-да рұқсат берілген. Апаттан кейін Испанияда бейсенбіден бастап үш күндік аза тұту жарияланды.