Қарашада Қазақстанда шетелдіктерге кіру тәртібі мен банк тарифтері өзгереді

Қазақстанда 1 қарашадан бастап шетелдіктерге арналған QazETA электронды рұқсат жүйесі кезең-кезеңімен енгізіле бастайды. Алғашқы кезеңде ол Ақтау халықаралық әуежайында және төрт автомобиль өткізу бекетінде қолданылады: Павлодар облысындағы «Үрлітөбе», Жамбыл облысындағы «Аухатты», Түркістан облысындағы «Атамекен» және Жетісу облысындағы «Нұрлы жол».

Рұқсатты шетелдік азаматтар QazETA мобильді қосымшасы арқылы рәсімдей алады. Өтінішті сапардан кемінде 72 сағат бұрын беру ұсынылады, қызмет тегін болады, ал рұқсат 180 күнтізбелік күнге жарамды. 2027 жылғы 30 маусымға дейін өтпелі кезең белгіленген: осы уақыт ішінде рұқсаттың болмауы елге кіруден бас тартуға өздігінен негіз болмайды. Жүйені 2027 жылғы 1 қаңтардан бастап Астана мен Алматы әуежайларында, 1 наурыздан бастап қалған өткізу бекеттерінде енгізу жоспарланған. Міндетті қолдану 2027 жылғы 1 шілдеде басталады.

29 қарашада барлық деңгейдегі мәслихат депутаттарының кезектен тыс сайлауы өтеді. Орталық сайлау комиссиясының мәліметінше, 228 мәслихаттағы 3447 депутаттық мандатқа сайлау өткізіледі. Дауыс беру учаскелері әдетте 7:00-ден 20:00-ге дейін жұмыс істейді, ал сайлау қорытындысы бес күн ішінде шығарылуы керек.

Air Astana 30 қарашада Алматыдан Токиоға алғашқы тікелей жолаушылар рейсін орындауды жоспарлап отыр. Рейстер Нарита әуежайына аптасына екі рет Airbus A321LR ұшағымен қатынайды. Алғашқы жолаушылар рейстерін қарашада Астанадағы зауытта жасалған Stadler вагондарымен іске қосу да көзделген. Бастапқы кезеңде шамамен 40–45 вагонды Астана–Алматы, Астана–Семей және Астана–Атырау бағыттарына шығару жоспарланып отыр.

Бірқатар банк қарашада қызмет көрсету тарифтерін өзгертеді. Halyk Bank 27 қарашадан бастап Open API сервисі арқылы телефон нөмірімен басқа қазақстандық банктерге аударым комиссиясын 200-ден 250 теңгеге дейін көтеруді жоспарлайды. KMF Bank 2 қарашадан қолма-қол ақша беру операцияларының кейбір тарифтерін қайта қарайды. Сол күннен бастап Евразийский банк «Автокарта – Mastercard World» өнімі бойынша жылдық қызмет ақысын алу тәртібін өзгертпек, ал ForteBank «Европа» және «Китай» пакеттеріне жаңа клиенттерді қосуды тоқтатады.