Гонконгтегі жойқын өртке сөнбеген темекі тұқылы себеп болуы мүмкін

Комиссия мәліметінше, Hong Chong ғимаратының 104 және 105-пәтерлерінің маңынан екі бүтін темекі тұқылы мен тағы бірінің қалдығы табылған. Сондай-ақ құрылысшылардың өртке дейін бірнеше ай бойы нысан аумағында темекі шеккені туралы деректер бар.

Темекі тұқылы өрттің тікелей себебі болғанын дәлелдейтін айғақ жоқ. Дегенмен тергеушілер жанама дәлелдердің жиынтығы осы нұсқаны қуаттайтынын айтты. Өрттің таралуына отқа төзімсіз қорғаныш торын қолдану, құрылыс кезіндегі қауіпсіздік талаптарын бұзу және біліксіз жұмысшылардың өртке қарсы жабдықты дұрыс пайдаланбауы да әсер еткен.

Комиссия құрбандар санының көп болуын оттың жылдам таралуымен, қою түтіннің эвакуацияны қиындатуымен және ғимарат кіреберістерінің маңында жанып жатқан бамбук бұтақтары мен өзге қоқыстың үйіліп жатуымен байланыстырды. Тергеу барысында өрт қауіпті жұмыстардан шыққан ұшқын, өздігінен тұтану, электр сымдарының ақауы және газдың шығуы ықтимал себептер қатарынан алынып тасталған.