Зеленский Путинмен Түркияда кездесуді ұсынды, Мәскеу өз талабын айтты

Зеленскийдің айтуынша, Түркия президенті Режеп Тайип Ердоғанның Путинмен байланысы кездесуді ұйымдастыруға көмектесуі мүмкін. Ол Түркияда бұған дейін делегациялар келіссөз жүргізгенін, ал Біріккен Араб Әмірліктерінде техникалық топтар кездескенін еске салды. Украина президенті одан әрі ілгерілеу үшін ел басшыларының саяси ерік-жігері қажет деп санайды.

Зеленский көшбасшылар кездесуі нақты нәтижеге жеткізуі тиіс екенін атап өтті. Оның сөзінше, ондай нәтиже болмаса, кездесу дипломатияның жеңілісі ретінде бағалануы мүмкін.

Лавров 30 қазанда Атлантада өткен G20 елдері сыртқы істер министрлерінің кездесуінен кейін Путиннің Зеленскиймен жеке жүздесуден бас тартпайтынын, бірақ кездесудің Мәскеуде өтуін қалайтынын айтты. Министр Зеленский Ресей астанасына келсе, оның қауіпсіздігіне кепілдік берілетінін мәлімдеді.

Лавров Ресей, АҚШ және Украина арасындағы Абу-Дабидегі үшжақты келіссөздердің келесі кезеңіне дайындық жалғасып жатқанын да растады. Кездесудің шамамен қарашаның ортасында өтетіні айтылды, нақты күндері келісілгеннен кейін жарияланады. Зеленский мен Ердоған 31 қазанда Стамбұлда кездесіп, қарашаның бірінші жартысындағы үшжақты форматқа дайындықты, сондай-ақ Түркия мен Еуропа серіктестерінің ықтимал қатысуын талқылады.