Қазақстан «Атырау — Самара» мұнай құбырымен тасымалды тоқтатты

Энергетика министрлігінің өкілі Әсел Серікпаеваның айтуынша, 2 қарашаға қараған түні Ресейдегі Самара өндірістік-диспетчерлік торабы нысандарына ұшқышсыз аппараттар шабуыл жасаған.

Мұнай айдау Астана уақытымен 06:09-да (Мәскеу уақытымен 04:09) тоқтатылды. Мамандар инфрақұрылымның техникалық жай-күйін бағалап жатыр. Министрлік бұл бағытпен мұнай қабылдау жақын уақытта қайта басталады деп күтеді, бірақ нақты мерзімін атаған жоқ.

«Атырау — Самара» учаскесі «Өзен — Атырау — Самара» магистральдық мұнай құбырының құрамына кіреді. Қазақстан мұнайы осы бағыт арқылы Ресейдің «Транснефть» жүйесіне жеткізіледі. «ҚазТрансОйл» мәліметінше, 2026 жылдың тоғыз айында осы учаскемен 7,573 млн тонна мұнай тасымалданған.