АҚШ Ормуз бұғазындағы Иранның Кешм аралына соққы жасады

АҚШ әскері Ормуз бұғазындағы Иранның Кешм аралына шабуыл жасады. Вашингтон бұл соққыларды, сондай-ақ Иранға жасалған соңғы күндердегі басқа шабуылдарды құпия ұстауға тырысқан.

АҚШ президенті Дональд Трамп 1 қарашада Айовадағы сайлауалды жиында Иранды «аяқтап тастамауының» жалғыз себебі «мейірімді болғысы келетіні» екенін айтқан. Ол мүмкіндігінше көп адамның өмірін сақтап қалуға тырысатынын мәлімдеп, артынша: «Бірақ бір сәтте оларға балғаны көрсетуге тура келеді. Мұның бәрі жақын арада аяқталады. Өте жақын арада», — деп ескерткен.

Бір күннен кейін Трамп АҚШ сайлаудан соң Иранға шабуылын қайта бастай ма деген сұраққа «Жоқ» деп жауап берді. Вашингтондағы сөзінде ол: «Біз Иранмен соғыстық. Жеңдік. Ормуз бұғазын бақылап отырмыз», — деді.

Кешмге жасалған соққылар АҚШ пен Иран арасындағы келіссөздер жалғасып жатқан кезде болды. Иранның сыртқы істер министрі Аббас Арагчи 1 қарашада келіссөз жүргізген делегациясы Катардан кеткеннен кейін делдалдар арқылы келіссөздер «өте қарқынды» жүріп жатқанын айтты.