Астанада 100 млн теңге пара алған экс-шенеунік 10 жылға сотталды

Астана қаласының қылмыстық істер жөніндегі мамандандырылған ауданаралық соты Батыс Қазақстан облысындағы пара алу ісі бойынша бұрынғы шенеунік пен делдалға үкім шығарды.

Соттың мәліметінше, облыстық мемлекеттік кірістер департаменті басқармасы басшысының міндетін атқарған Р. 2025 жылғы қыркүйек пен қазан аралығында Ресейден Қазақстанға өтетін жүк көліктерін кедергісіз өткізу үшін 100 миллион теңге алған. Іс 1003 жүк көлігіне қатысты болған. Р. сондай-ақ пара берушіге оның заңды тұлғалары мен жеке кәсіпкерлерінің тәуекелдерді басқару жүйесіне енгізілген-енгізілмегені туралы ақпарат беріп, шектеулерді айналып өтуге қатысты кеңес берген.

Ақшаны жеткізуге көмектескен К. делдалдық қызметі үшін 24,8 миллион теңге алған. Сот Р.-ды Қылмыстық кодекстің 366-бабы 4-бөлігі бойынша кінәлі деп танып, мүлкін тәркілеумен бірге 10 жылға бас бостандығынан айырды. Ол өмір бойы белгілі бір лауазымдарды атқару құқығынан да айырылды.

К.-ға Қылмыстық кодекстің 368-бабы 1-бөлігі бойынша 1 жыл 6 ай жаза тағайындалып, мүлкі тәркіленді және белгілі бір лауазымдарды атқаруға өмір бойына тыйым салынды. Сот екеуінің де кәмелетке толмаған балалары барын ескеріп, жазаны жеңілдеткен. Р.-ға қатысты антты бұзу ауырлататын мән-жай деп танылды, ал К.-ның ісінде ауырлататын мән-жайлар анықталмады.

Сот қылмыстық жолмен алынған деп танылған ақшаны мемлекет кірісіне аударып, сотталғандардан заңсыз алған сомаларын өндіріп алуды ұйғарды. Үкім заңды күшіне әлі енген жоқ.