Қазақстанда көлік сақтандыру тәртібін өзгерту ұсынылды

Freedom Insurance басқарма төрағасы Азамат Керімбаев сақтандыру заңнамасын реформалауға арналған шарада міндетті автосақтандыруға енгізілуі мүмкін жаңалықтарды таныстырды.

Ұсыныс қабылданса, сақтандыру компаниясы көлікті өзі ұсынған техникалық қызмет көрсету станциясына жөндеуге жібере алады. Алайда жөндеу мен ақшалай төлемнің бірін зардап шеккен жүргізуші таңдайды. Жөндеу көлік ТҚС-ға тапсырылғаннан кейін 30 жұмыс күні ішінде аяқталуы керек, ал оған кемінде алты ай кепілдік берілмек. Кепілдік мерзіміндегі, жасы екі жылдан аспаған көліктерді ресми дилер жөндеуі тиіс. Қолданылған немесе қалпына келтірілген бөлшектерді көлік иесінің келісімімен ғана пайдалануға болады.

Көлік қалпына келмесе, жөндеу құны сақтандыру сомасынан асып, иесі айырмасын төлеуге келіспесе немесе сақтандырушы лайықты ТҚС ұсына алмаса, ақшалай өтем қарастырылмақ. Өтем түрін жөндеуге жолдама берілгенге дейін өзгертуге болады.

Міндетті сақтандыру бағасына реттеуші белгілейтін ең төменгі және ең жоғарғы шектер енгізу ұсынылды. Компаниялар полис құнын осы аралықта клиент пен тәуекел туралы деректерге сүйенген бағалау үлгілері арқылы анықтайды. Тариф есептеу әдістемесі ашық болуы тиіс, ал шектердің нақты мөлшері әзірге белгісіз. Сақтандырушылар тозуды есепке алмай өтемақы төлеуді қамтитын қосымша қорғау түрлерін де ұсына алады.

Сақтандыру төлемін алуға көмектесетін кеңесшілерді арнайы тізілімге енгізу көзделген. Олар жоғары заң білімі бар, сотталмаған және сақтандыру компанияларымен, брокерлермен не агенттермен байланысы жоқ азаматтар болуы керек. Кеңесші сақтандырушының атынан өкілдік ете алмайды, одан сыйақы ала алмайды, клиенттің төлемін иемденуге немесе төлемді талап ету құқығын сатып алуға құқылы болмайды; оның қызметіне ақы төлеу тапсырма шарты бойынша жүргізіледі.

КАСКО-ны қоса алғанда, ерікті сақтандыру шарттарын электронды түрде жасасу және бұзу, сақтандыру жағдайларын деректер базасы арқылы реттеу ұсынылып отыр. Компаниялар сайттарында бұл қызметтерге тәулік бойы қолжетімділікті қамтамасыз етуі тиіс. Әзірге мұның бәрі — ұсыныс; заң 2027 жылы қабылдануы мүмкін, ал оған дейін нормалар мен талаптар өзгеруі ықтимал.