Қазақстандық әйел iPhone-ның екінші IMEI-нөмірін тіркей алмай жүр

Әйелдің айтуынша, ол iPhone 16 Pro Max телефонын 2025 жылғы қаңтарда танымал маркетплейс арқылы сатып алған. Құрылғыдағы екі IMEI-нөмірдің бірі бұрын пайдаланған физикалық SIM-картаға, екіншісі қазір қолданып жүрген eSIM-ге тіркелген.

Қыркүйекте шетелден оралған соң оған 6914 нөмірінен телефонды верификациялау қажеттігі туралы хабарлама келген. Алдымен өтініш беру мерзімі 16 қазанға дейін белгіленіп, кейін 5 қарашаға дейін ұзартылған. Әйел eGov арқылы өтініш беруге тырысқанымен, екінші IMEI-ді тіркеу тармағын таппаған. Қолдау қызметі бұл мүмкіндік уақытша жұмыс істемейтінін хабарлаған.

Жүйе жеткізушісінің мәліметінше, 2025 жылғы 25 наурыздан бастап өтпелі кезеңде Қазақстанда жаңа талаптар енгізілгенге дейін пайдаланылған телефондардың қосымша IMEI-нөмірлерін жеңілдетілген тәртіппен тіркеуге болатын. Алайда бұл рәсім алаяқтық мақсатта қолданылған жағдайлар анықталғандықтан тоқтатылған. Жаңа құрылғыны верификациялағанда барлық IMEI-нөмірді бір өтініште көрсету қажет. Ал телефонын пайдаланып жүрген, бірақ екінші нөмірін тіркеп үлгермеген азаматтарға мобильді операторына жүгініп, SIM-карталарды слоттар арасында ауыстыру мүмкіндігін нақтылау ұсынылды. Өтініш авторы верификацияға қайта өтініш беріп, жауап күтіп отыр.