Қазақстан мен Тәжікстан Астанада 14 құжатпен алмасты

Қазақстан мен Тәжікстан 2030 жылға дейінгі тауар айналымын арттыруға арналған жол картасын әзірледі. Екі елдің энергетика министрліктері мұнай өнімдерін жеткізу саласындағы ынтымақтастық туралы негіздемелік келісіммен алмасты.

Үкіметтер электр энергетикасы бойынша ынтымақтасуға, сондай-ақ тау-кен және тау-кен металлургиясы салаларында ұзақ мерзімді жобаларды дамытуға уағдаласты. Өнеркәсіп ведомстволары 2027 жылға арналған жұмыс жоспарын, ал ауыл шаруашылығы министрліктері 2027–2028 жылдарға арналған жол картасын әзірледі.

Қазақстанның Жасанды интеллект және цифрлық даму министрлігі мен Тәжікстанның Инновациялар және цифрлық технологиялар агенттігі жасанды интеллект саласындағы ынтымақтастық туралы меморандуммен алмасты. Қазақстанның Сауда министрлігі осы агенттікпен электрондық сауданы дамыту жөнінде бөлек меморандумға қол қойды.

Қазақстанның Еңбек министрлігі мен Тәжікстанның Әлеуметтік сақтандыру және зейнетақы агенттігі зейнетақымен қамсыздандыру саласында ақпарат алмасуға келісті. Бұдан бөлек, екі елдің тиісті министрліктері денсаулық сақтау саласындағы ынтымақтастық туралы, ал үкіметтер Тәжікстанның шекара әскеріне кадр даярлау жөнінде келісім жасасты.

Тағы үш меморандумға екі елдің бас прокуратуралары, Қазақстанның Мемлекеттік қызмет істері агенттігі мен Тәжікстанның Қаржылық бақылау және сыбайлас жемқорлыққа қарсы күрес агенттігі, сондай-ақ Қазақстан Президентінің Телерадиокешені мен Тәжікстанның Теледидар және радио комитеті қол қойды.