Жеке басқарушыларға зейнетақы активтерінің 30%-ына дейін берілуі мүмкін

Қазақстанның капитал нарығын 2026-2030 жылдары дамыту бағдарламасында жеке басқарушыларға зейнетақы активтерін кезең-кезеңімен беру көзделген. Бұл өз еркімен жеке компанияны таңдаған салымшылардың қаражатымен ғана шектелмейді: Ұлттық банк өзі басқаратын активтердің бір бөлігін де арнайы инвестициялық мандаттар аясында беруді жоспарлап отыр.

Басқарушылар конкурспен таңдалады. Алғашқы кезеңде инвестициялық саясатты айқындау және тәуекелдерді бақылау Ұлттық банкте қалады. 2027 жылы басқарушыларды іріктеу тәртібін, инвестициялық мандаттар мен бағалау көрсеткіштерін әзірлеу жоспарланған. 2027-2028 жылдары тетік реттеуші құмсалғыш аясында сынақтан өтеді.

Алдымен жеке компанияларға мемлекеттік бағалы қағаздар портфельдерін басқару ұсынылуы мүмкін. Кейін корпоративтік облигациялар, қазақстандық компаниялардың акциялары және басқа да активтерді қосу көзделген. Басқарушылардың жұмысы бенчмаркпен салыстырғандағы кірістілігі, мандат талаптарын орындауы және тәуекел шектеулерін сақтауы бойынша бағаланады. Нәтижесі төмен болса, компанияға берілген активтер көлемі азайтылып, басқа басқарушыға өткізілуі мүмкін.

БЖЗҚ дерегінше, 2026 жылғы 1 қазанда Ұлттық банктің басқаруында 26,63 трлн теңге болған. Бұл қордың 26,84 трлн теңгелік активтерінің 99,24%-ына тең. Жеке компанияларға 206 млрд теңгеден сәл астам қаражат немесе жалпы соманың 0,76%-ы тиесілі.

2030 жылға қарай жеке басқарушыларға активтердің 20-30%-ы берілсе, олардың портфелі шамамен 5,37-8,05 трлн теңгеге жетуі мүмкін. Бұл қазіргі басқаруындағы қаражаттан 26-39 есе көп. Нақты көлем іріктеу тәртібі мен бағдарламаның іске асуына байланысты болады.