Қазақстанда автонесиеге өтінімдердің 17 пайызы ғана мақұлданған

Бірінші жартыжылдықта берілген өтінімдердің 16,9 пайызы мақұлданды. Бұл шамамен 450 мың өтінім. Кепілсіз тұтынушылық несие бойынша өтінімдердің үштен бірі, ал ипотека бойынша 28 пайызы мақұлданады.

1 қазандағы жағдай бойынша банктердің автонесие портфелі 4,4 триллион теңгеге жетіп, жыл басынан бері 8,5 пайызға өсті. Ал бөлшек кредиттеу көлемі жалпы алғанда 7,6 пайызға артты. Автонесиенің бөлшек несие портфеліндегі үлесі 16,4 пайыз болып, жыл басынан 0,2 пайыздық тармаққа көбейді.

Реттеуші автонесиеге қатысты борыш жүктемесінің коэффициентіне қойылатын талаптардан босатуды ұзарту туралы шешім қабылдады. Қазір бұл талаптар жаңа көлік сатып алғанда, сондай-ақ бастапқы жарнасы кемінде 50 пайыз болатын жүрілген көлікке несие рәсімдегенде қолданылмайды. Жасы үш жылға дейінгі жүрілген көлікке бастапқы жарна кемінде 30 пайыз болса да жеңілдік беріледі.

Қазақстанда борыш жүктемесінің шекті коэффициенті — 0,5. Бұл талап қолданылатын несие берілгенде банк қарыз алушының жаңа қарызды қоса есептегендегі ай сайынғы төлемдері орташа айлық табысының 50 пайызынан аспауын тексереді.