Газа ауруханасына жасалған соққыдан кемінде алты адам қаза тапты

Газа секторының оңтүстігіндегі ең ірі Нассар ауруханасына жасалған Израиль әуе соққысынан кемінде алты адам қаза тауып, 20 шақтысы жараланды. Бұл туралы ХАМАС бақылауындағы Палестина Денсаулық сақтау министрлігі хабарлады.

Министрліктің мәліметінше, қаза болғандардың арасында медицина қызметкерлері, науқастар және оларды алып жүрген адамдар бар. Қаза тапқандардың бірі — хирург Ризк Абу Шайра. Куәгерлер зымыран хирургия және жансақтау бөлімдері орналасқан ғимаратқа тигенін айтқан.

Израиль әскері соққының нысанасы ХАМАС-тың қарулы қанатының командирі және аурухананы шабуылдарды жоспарлау үшін «штаб» ретінде пайдаланған басқа содырлар болғанын мәлімдеді. ХАМАС бұл уәжді жоққа шығарып, Израильді «жалған нұсқалар» тарату арқылы әскери қылмысын жасыруға тырысты деп айыптады.

Халықаралық құқық бойынша ауруханалар қорғалатын нысандар саналады. Израиль ХАМАС-ты азаматтық инфрақұрылымды әскери мақсатта пайдаланды деп айыптайды, ал топ бұл айыптауларды теріске шығарады. Израиль халықаралық ақпарат агенттіктерін Газаға кіргізбейтіндіктен, оқиғаны тәуелсіз бағалау қиын.