Украинадағы соғыста қаза тапқан 287 мыңнан астам ресейліктің аты анықталды

Ашық деректерге сүйенген тізімде Ресейдің Украинаға басып кіруі кезінде қаза тапқан 287 831 әскери қызметшінің аты-жөні анықталған. Олардың 52 пайызы соғыс басталғанға дейін армиямен байланысы болмаған еріктілер, жұмылдырылғандар және колониялардан әскерге кеткен сотталғандар.

Тізімге некрологтар, туыстарының жазбалары, зираттар мен ашық мемлекеттік тізілімдердегі мәліметтер енгізілген. Деректердің кеш түсуіне байланысты қаза тапқандардың нақты саны жоғары болуы ықтимал. 2025 жылы мәйіттер орта есеппен адам қаза тапқаннан кейін 150 күннен соң табылған, ал өлім туралы құжаттар орта есеппен 236 күннен кейін рәсімделген.

Қараша айының басында хакерлік топтар Росстаттың ішкі деректеріне қол жеткізгенін мәлімдеді. Росстат кибершабуылды растағанымен, ақпараттың сыртқа шыққанын жоққа шығарды. «Киберпартизан BY» соғыс басталғалы әскери қимылдар немесе олардың салдары себеп болған 393 881 өлім жазбасын анықтағанын айтса, Silent Crow 450 100 адам деген сан келтірді. Бұл деректер әлі тексеріліп жатыр; санақ тәсілдері мен өлім себептерінің санаттары әртүрлі болғандықтан, сандардың дәлдігіне қатысты сұрақтар бар.

Қаза тапқандардың аты-жөні бойынша тізімге сүйенген есепте нақты шығын 523 329 бен 639 624 адам аралығында болуы мүмкін делінген. Бұл бағалау Росстат деректерінің ықтимал сыртқа шығуына негізделмеген. Солтүстік Корея әскери қызметшілері мен 2023 жылға дейін Ресей армиясына қосылмаған өзін-өзі жариялаған Донецк және Луганск «халық республикаларының» жасақтары есепке бөлек алынған. Оларды қосқанда, Ресей жағында соғысқан күштердің жалпы шығыны 546 633-тен 665 428 адамға дейін жетуі мүмкін.