Маңызды сәт: Президенттікке үміткерлердің арасында теледебат қашан өтеді?

Сайлау алдындағы президентікке үміткерлердің телевизиялық дебаты 29-мамырда Нұр-Сұлтан қаласында өтеді деп жоспарлануда. 

Үміткерлер арасындағы теледебат «Хабар» арнасынан көрсетіледі.

Теледебат 3 кезеңнен тұрады.

1-кезеңнің тақырыбы – «Қазақстанның экономикалық дамуындағы басымдылық». Бұл кезеңнің өзі екі бөлімнен құралған. Алғашқы бөлімінде әрбір үміткер өздерінің сайлау алдындағы бағдарламасын таныстырады. Екінші бөлім үміткер мен оның қарсыласының арасындағы сұрақ-жауап түрінде өтеді. Үміткерлер қарсыластарына екі сұрақ қойып, сонымен қатар өздері екі сұраққа жауап беруге мүмкіндік алады.

2-кезеңнің тақырыбы – «Қазақстанның әлеуметтік жаңғыруы». Бұл кезеңнің бірінші бөлімінде үміткерлер берілген тақырып бойынша сөз қозғайды. Екінші бөлімінде жүргізуші барлық үміткерлерге ортақ сұрақ қояды.

3-кезеңнің тақырыбы – «Сайлаушыларға арналған сөз». Осы кезеңде үміткерлер сайлауда дауыс берушілермен тікелей байланыс жасайды.

Президентті сайлау 9-маусым күні таңғы 7-ден кешкі 8-ге дейін өтеді.