Қазақтың Құрманғазы оркестрі Ресей мен Қытай еліне барып қайтты

Биылғы жылдың мамыр айында ҚР Мәдениет және спорт Министрлігінің қолдауымен және 85 жылдық мерейтой аясында, Құрманғазы атындағы Қазақ мемлекеттік академиялық халық аспаптары оркестрі Ресей Федерациясы: Мәскеу және Санкт-Петербург қалаларына, Қытай Халық Республикасы: Пекин қаласына және Батыс Қазақстан облысына гастрольдік сапармен барып қайтты.

Гастрольдік концерттер ҚР Тұңғыш Президенті Н.Ә.Назарбаевтың «Жаһандық әлемдегі заманауи қазақ мәдениеті» бағдарламасын жүзеге асыру және елдердің ынтымақтастығы мен достық қарым-қатынасын нығайту мақсатында өтті.

«Ұлы даланың әуендері» деп аталған гастрольдік концерттің алғашқысы Ақтөбе қаласынан бастау алды. Содан кейін, Ресей елі- Мәскеу қаласында, 3 мамыр күні,  «Геликон-Опера» сахнасында жалғасын тапса, келесі концерт 5 мамыр күні Санкт-Петербург қаласы, Михайловский театрда өтті. Сонымен қатар, оркестр 6 мамыр күні Санкт- Петербург қаласында Кеңес Одағының батыры Әлия Молдағұлованың ескерткішінің ашылу салтанатында өнер көрсетті.

Ресейден кейін Оркестр Батыс Қазақстан облысының аудандарында гастрольдік концерттерін жалғастырды.

Сонымен қатар, 16-22 мамыр аралығында, Құрманғазы оркестрі Қытай Халық Республикасы, Пекин қаласында өткен «Азия өркениеттерінің диалогы конференциясында» (Conference on Dialogue of Asian Civilizations) өнер көрсетіп қайтты.