Сайлау алдындағы теледебаттардың тақырыптары белгілі болды

29 мамыр күні сағат 18.00-де «Хабар» телеарнасының тікелей эфирінде сайлау алдындағы дебаттар мен пікірталастар өтеді. ҚР Орталық сайлау комиссиясының бекітілген регламентіне сәйкес теледебаттар мен пікірталастар 3 раундқа бөлінген. 

Бірінші раундтың тақырыбы – «Қазақстанның экономикалық дамуының басымдықтары». Алғашқы раунд  екі турды қамтиды.

Бірінші турда әрбір қатысушы өзінің сайлау алдындағы бағдарламасын  таныстырып, сөз сөйлейді.

Екінші турда қатысушылардың өздерінің оппоненттеріне «сұрақ-жауап» түріндегі пікірсайыс сессиясы қарастырылған. Қатысушылар екі сұрақтан қойып, екі сұраққа жауап бере алады.

Екінші раундтың тақырыбы – «Қазақстанның әлеуметтік жаңғыруы».

Екінші раундтың бірінші турында қатысушылар берілген тақырып бойынша сөз сөйлейді.

Екінші турда жүргізушілер барлық қатысушыларға бір сұрақ қояды. 

Үшінші раундтың тақырыбы – «Сайлаушыларға сөз арнау». Үшінші, қорытынды раундта қатысушылар тікелей сайлаушыларға арнап сөз сөйлейді.  

Түсірілім «Қазмедиа орталығы» медиакешенінде ұйымдастырылады. Жүргізушілер – Ерлан Игісінов пен Қымбат Досжан. Кәсіби шығармашылық ұжым ҚР Орталық сайлау комиссиясының мүшелерімен бірлесіп, сайлауалды дебаттар мен пікірталастардың телевизиялық нұсқасын әзірлеу үшін  дайындық жұмыстарын жүргізіп жатыр.