ҚЫТАЙ: Айт мерекесін тойлағандар лагерьге тоғытылады

Қытайда аз ұлттарға жасалған қысым азаяр емес. Рамазан айында Ораза ұстауға түрлі кедергі жасап, Ораза ұстағандарды лагерьлерге жауып, қысым көрсеткені жайлы ақпарат әлем мұсылмандарын дүр сілкіндірген болатын. Қытай билігі Ораза ұстамағанын тексеру мақсатында Рамазан айында мұсылман дінін ұстанушыларға түскі асты тегін беріп, арақ-шарап ішуге және саудалауға мәжбүрлеген. Көнбегенін абақтыға жапқан. 

Енді халықаралық ұйымдардың сарапшылары Шыңжаңда Айт мерекесіне байланысты билік тарапынан ескертулер жасалынып жатқанын айтуда. Қытай билігі Айт мерекесін тойлағандарды жазаламақ. Лагерьге қамалу қаупі жоғары дейді олар. HumanRightsWatch ұйымының Қытайдағы сенімді өкілдері жергілікті халықтан анонимді сұрау алуға тырысқан. Алайда билік тарапынан кедергі туындаған. Дегенмен екі мұсылманнан алынған жауапқа сай, олардың Айт мерекесін тойламайтыны белгілі болды. Басты себеп Қытай билігінен және лагерьден қорқу екен.