«Қуанышты да, қиыншылықты да бірге өткіздік» Назарбаев депутаттарға алғыс айтты

Қазақстанның тұңғыш президенті – Елбасы Нұрсұлтан Назарбаев өзіне "Құрметті сенатор" мәртебесін берген депутаттарға ризашылығын білдірді. Бұл туралы sputniknews.kz хабарлайды. 

"Бүгін сенатқа арнайы келіп, өздеріңізбен жүздескеніме өте қуаныштымын. Осы аласапыран отыз жылдың ішінде көпшілігіңізбен бірге келе жатырмыз. Қуанышты да, қиыншылықты да бірге өткіздік, елмен, жұртпен бірге қызмет істеп, еңбегіңізді сіңіріп келе жатырсыздар", - деді Назарбаев сенатта "Құрметті сенатор" төсбелгісі табысталғаннан кейін.

Елбасы заңды сүзбеден өткізіп, өңірлердің ойын ескеру үшін әдейі осындай қос палаталы парламент құрғанын атап өтті.

"Маған "Құрметті сенатор" мәртебесін беру туралы шешім қабылдағаныңыз үшін шын жүрегіммен ризашылығымды білдіремін. Бұл біздің егемен еліміздің осы жылдардың ішінде  жасаған еңбегіме деген құрмет деп білемін", - деді ол.

Назарбаев тәуелсіздік жылдары парламент көп заң қабылдағанын, оның ішінде шиеленіскен заңдар да болғанын айтты. Дегенмен, сенат байсалдылықпен қарап, оның бәрін орнына келтіргенін атап өтті.

"Сондықтан еліміз тыныш болды. Ешқандай жағдайға жол берген жоқпыз", - деді Елбасы.