Шымкентте «Shymkent Bus» автобус паркі ашылды

Автобус паркінде жанармай бекеті, сервистік орталық, автожуу қызметінен бөлек, қызметкерлер үшін жатақхана, медпункт және жүргізушілерге арналған асхана да қарастырылған.

Бүкіл талаптарға жауап беретін заманауи жаңа автобус паркінің ашылуына қатысқан қала әкімі Ғ.Әбдірахымов бұл жоба қоғамдық көліктердің кедергісіз және сапалы жұмысын қамтамасыз ететінін атап өтті.

Аталған жобаның операторы болып «Shymkent» әлеуметтік-кәсіпкерлік корпорациясы» АҚ анықталып, ал әріптестері  болып «БРК-Лизинг» АҚ мен «СарыарқаАвтоПром» АҚ белгіленді. Сондай-ақ алдағы уақытта жоба аясында жол ақысын төлеудің «Оңай» электрондық жүйесін орнату жоспарлануда.

Қаладағы автобустарды жаңалау үшін аталған парк жыл соңына дейін жаңа мың автобуспен толықтырылады. Бүгінгі таңда жоспарланған 300 жаңа автобустың 160-ы жеткізілсе, қалған 140 автобус шілде айында алып келінетін болады.

Елімізде құрастырылған  жаңа автобустар  салқындатқыштармен, пандустармен, бейнекамералармен, жолаушылар ағынының датчиктерімен, GPS-трекерлермен жабдықталған. Автобустың жалпы сиымдылығы 56 адам.