Пекинде робототехниканың дүниежүзілік көрмесі ашылды

Қытай астанасында Дүниежүзілік робототехника конференциясы (World Robot Conference 2019) ашылды, деп хабарлайды Bugin.kz тәуелсіз авторлар платформасы BNews.kz сайтына сілтеме жасап. 

Оған Қытайдан және әлемнің басқа елдерінен 300-ге жуық кәсіпорын қатысуда. Конференцияда дәстүрлі түрде сала өкілдері мен әзірлеушілер форумы өтеді, оған Германия, Италия, Канада, Қытай, Корея Республикасы, Ресей, АҚШ, Швейцария, Жапония елдерінен сарапшылар қатысады. 

Панельдік талқылаулар барысында олар өндірістегі жаңа технологиялардың интеграциясы, нарық пен саланың даму болашағы, сондай-ақ сектор алдында тұрған міндеттерді талқылауға мүмкіндік алады. Пекиндегі Бүкіләлемдік робототехникалық көрмесінде өздерінің керемет шеберліктерін көрсеткен роботтардың саны көп. 

Көрмеге келушілер әлемдегі 180-нен астам танымал робот-құрылыс кәсіпорындарының, сонымен қатар ғылыми-зерттеу мекемелерінің техникалық жетістіктерімен және өнімдерімен танысты. Көрмеге роботтық ойыншықтар мен гуманоидтардан бастап, көп тонналық өнеркәсіптік манипуляторлар мен жасанды интеллектісі бар экзоскелеттерге дейінгі 700-ден астам жабдықтар қатысып жатыр. 

Ән айту мен билеу, салмақ көтеру және заттарды үйде тәртіпке келтіру, балалармен көңіл көтеру және мейрамхана келушілерге қызмет көрсету, өрттерді сөндіру және роботтардың адамдарға қызмет көрсетулері – конференцияның басты бағытына айналды. 

- Роботтардың дамуы бірнеше ондаған жылдар бойы жалғасып келеді, ал білім беру, денсаулық сақтау және күтім саласындағы роботтарды жасау өте жоғары талаптарға ие, бұл өте қиын, сондықтан қазір робототехникамен айналысатын компаниялар үшін бұл ең жоғары деңгей. Бұл салада үлкен қиындықтар бар, сондықтан көптеген компаниялар бұған елеулі араласпайды, - деді қарттарға, науқастарға және мүгедектерге күтім жасау үшін роботтар шығаратын компанияның өкілі Чен Лян. 

Дүниежүзілік робототехника конференциясы 25 тамызға дейін жалғасады. 22 тамыздан бастап экспозиция журналистер мен сала өкілдері үшін ғана емес, сондай-ақ көпшілік үшін де ашылады.