«Менің Жанарға ренішім жоқ» Нұржан Керменбаев марқұм әншіге қатысты пікір білдірді

Нұржан Керменбаев марқұм әншіге еш реніші жоқ екенін атап өтіп, халықтан орынсыз жала жаппауын сұрады

"Арнау" дуэтінің әншісі Нұржан Керменбаев бұрынғы әріптесі Жанар Хамитованың өліміне қатысты пікір білдірді.

"Суық хабарды естіп жатырмыз. Иманды болғай. Артық әңгіме айтып, отбасыма тіл тигізбеулеріңізді сұраймын", - деп жазды Керменбаев Instagram парақшасында.

Жанар Хамитова "Арнау" дуэтінің экс-әншісі болғандықтан, Нұржан Керменбаевқа көптеген хат-хабар келіп жатыр екен, сол себепті әнші қоғам алдында өз ойын жазуды жөн көріпті.

Сондай-ақ Нұржан Керменбаев марқұм әншіге еш реніші жоқ екенін атап өтіп, халықтан орынсыз жала жаппауын сұрады.

"Менің Жанарға ренішім жоқ, сондықтан кешірудің де орны жоқ" деген болатынмын. Бос сөзге әуре болғанша, өз өміріміздің де соңы бар екенін ұмытпайық. Бір-бірімізге жала жауып, ғайбат айтып, күнә жинағанша, өз өміріміздің де дәм-тұзы таусылатынын ұмытпайық, ағайын. Шәкәрімнің сөздері осы кезде орынды болар: біреудің мінін тергенше, жамандығын көргенше, өз ойыңды мазалап,өз бойыңды тазалап, өзіңмен күрес өлгенше...", - деп жазды әнші постында.

Сөз соңында Нұржан Керменбаев Жанардың отбасына, ағайын-туыс, бауырларына көңіл айтты.

Айта кетсек, бүгін әнші Жанар Хамитованың Қарағанды облысы Қарқаралы ауданындағы туған ауылында көз жұмғаны белгілі болды.

Қарағанды облысы полиция департаментінің баспасөз қызметі әртістің көз жұмғанын растап, қайғылы оқиға бойынша тергеу жүргізіліп жатқанын атап өтті. Полицейлердің  айтуынша, тергеу қылмыстық кодекстің 105 бабының 1-тармағы (Жәбiрленушiнi қорқыту, оған қатыгездiкпен қарау немесе оның адами қадір-қасиетiн үнемі қорлау арқылы адамды өзiн-өзi өлтiруге дейін немесе өзiн-өзi өлтiруге баруға дейiн жеткiзу) бойынша жүріп жатыр.