Сапарбаев: Жамбылда АӘК алатындар азаяды

Премьер-министрдің орынбасары Бердібек Сапарбаевтың сөзінше, Жамбыл облысы дотациялық өңір. Халқының 60%-дан астамы ауылдық жерде тұрады.

Мұнда өзін-өзі жұмыспен қамтығандар көп. Өңірде тұрақты табысы жоқ азаматтар да аз емес.

- 2,5%-дық несие ауылда тұратындардың тұрмысын түзеуге септігін тигізеді. Нәтижесінде атаулы әлеуметтік көмек алатын адамдардың саны азаяды. Біз бұл жобаны облыс әкімдігімен бірнеше рет талқыладық. Барлығын есептедік. Облыс әкімдігіне айтатын өтініш, біз көптеген жобаларды жүзеге асырғанмен кейде соның нәтижесіне жетпей қаламыз. Сондықтан облыс әкімдігі мұны күнделікті бақылауы керек. Ойдағы нәтижеге қол жеткізсек, жобаны еліміздің басқа өңірлеріне енгіземіз, – деді вице-премьер.

Естеріңізге салайық, бір айдан соң Жамбыл облысында халықтың табысын арттыруға бағытталған қанатқақты жоба жүзеге асырылады. Бұл бастаманы Жамбыл облысының әкімдігі көтерген.

Статистика бойынша, облыстағы жұмыс күшін саралайтын болсақ жұмысы бар 506 мың адамның 35%-ы немесе 177 мыңы өзін-өзі жұмыспен қамтып отыр. Бұл – республикадағы ең жоғары көрсеткіштердің бірі.

Сондықтан аймақ атқамінерлері атаулы әлеуметтік көмектің орнына несие беру арқылы олардың өздеріне әл-ауқатын жақсартуға мүмкіндік беруді көздеп отыр. Ал атаулы әлеуметтік көмек алатын 31 мың отбасының 43 мың адамы еңбек етуге қабілетті.

Inbusiness.kz