Қайрат Жолдыбайұлы: Мұхамеджанның халықты кінәлаған біржақты жағымпаз уағызына қарсымын

Мұхамеджан Тазабектің полициялармен болған кездесуінде сөйлеген сөзі әлеуметтік желіде кешелі бері көпшіліктің талқысына түсті. Жақтап жатқандар да, даттап жатқандар да жетерлік. Белгілі дінтанушы Қайрат Жолдыбайұлы кешегі күні айтыскердің сөзіне қатысты пікір білдірген еді. Сонымен қатар басқа да белгілі тұлғалар Тазабектің әлеуметтік желіде жарияланған видеосын көріп, үнсіздік таныта алмады. Ал Мұхамеджан Тазабек өзін сынағандарға инстаграм парақшасында жауап берді. Ол видеоның монтаждалғанын айтып ақталды. Осы тұста, Қайрат Жолдыбайұылы бұл жағдайға қатысты тағы да өзінің ойын жеткізді. 

«Өмірде мені талай адам ренжітті, сыртымнан өсек айтты. Неше адам сатқындық жасады, бетіме мақтап, арқамнан қанжар сұқты. Солардың бәрін "пенде ғой, қателесуге қақысы бар" - деп кешірдім. Тіпті аттарын атап, игі тілек тіледім. Ешкімге кек сақтамауға тырысамын. Бұл менің жеке басыма жасалған пендешілікке қатысты берік ұстанымым. Бірақ дінге, халыққа жасалған қиянатқа, әділетсіздікке үнсіз отыра алмаймын.

Мұхамеджан Тазабекпен бес берес, алты аласым жоқ. Оңтайлы ситуацияны пайдаланып қалайын деген қара басымның ұсақ есебі де жоқ. Бірақ Мұхамеджанның дінді аргумент ретінде қолданып, полицейлерді халыққа қарсы қайрауына қарсымын. Халықтың көңілін діннен суытуына қарсымын. Халықты кінәлаған біржақты жағымпаз уағызына қарсымын. Осындай біржақты теріс уағыздар мемлекетке деген жанашырлық емес, керісінше қастандық. Мәселені одан әрі ушықтыру, халықты одан әрі ашындыру. Полицейлер, халық оның кешегі сөзінен не ұқты? Қағбада намаз оқып тұрған адамды тебуге болатын болса, көшеге шыққан адамды кемпір, шалына қарамай жаншып тастасаң да болады, тіпті сауапты іс екен деп түсінді. Міне мен осыған қарсымын! Дінді саясатқа қолжаулық еткеніне наразымын», - деп жазды Қайрат Жолдыбайұлы.