12%: Қазақстанда бір жыл ішінде жалақы мөлшері өсті

2019 жылдың ІІІ тоқсанында бір қызметкердің орташа айлық атаулы жалақысы 191,1 мың теңгені құрады. Бұл туралы Статистика комитеті хабарлады.

Атаулы жалақы 2018 жылдың ІІІ тоқсанымен салыстырғанда 18,1%-ға, ал нақты жалақы 12%-ға өсті.

Салалық құрылымда ең жоғары номиналды жалақы қаржы және сақтандыру қызметінде – 484,6 мың теңге (орташадан 2,5 есе жоғары), тау-кен өнеркәсібінде және карьерлерді қазуда – 418 мың теңге (2,2 есе), ғылыми және техникалық қызметте – 334,1 мың теңге (1,7 есе), құрылыс саласында — 257,7 мың теңге (1,3 есе) белгіленді.

Атаулы жалақының ең төмен деңгейі білім беруде – 122,1 мың теңге болып белгіленді, бұл республикалық көрсеткіштен 36,1%-ға төмен.

Өңірлік бөліністе ең жоғары номиналды жалақы Атырау облысында тіркелді – 361,5 мың теңге. Ал Түркістан облысында бұл көрсеткіш 122,8 мың теңгені құрады.