Қазақстандық теміржолшы жігіт ойламаған жерден әлемге танымал болды

Павлодар облысының Ақсу қаласындағы жас теміржолшы Иманбек Зейкенов жазған тректің әлемдік музыкалық чартта танымалдығы артып отыр. Saint JHN –нің Roses атты әніне жазылған ремикс Shazam-да екі жарым миллион рет ізделген. Композиция ТМД елдеріндегі хит-парадты да бастап тұр.

"Мен үйде Saint JHN-нің әуенін естідім. Осы әнге екі сағатта ремикс жаздым. Кейін ол видеоны интернетке жүктедім. Достарыма ұнады, бірақ айтарлықтай еш нәрсе болған жоқ. Үш айдан соң трек бір миллион жазылушысы бар топта жарияланыпты. Адамдар әуенді сол жерде тыңдай бастады. Бір немесе бір жарым айдан соң маған түрлі продюсерлер хабарласа бастады", - деді Зейкенов.

Иманбек Зейкенов темір жолда сигналшы болып істейді. Ал бос уақытында үйінде отырып, түрлі хит шығарады.

Ол ресейлік Effective records лейблі үшін трек жазуға келісті. Қазіргі уақытта бұл лейблдің ремикстері Apple Music, Google Play Music, Spotify, BOOM–да сатылады.

Roses ремиксінен авторға ақшалай пайда түсетіні анық. Тректің музыкалық алаңдарда сатылғаны үшін автор өз үлесін алады. Сома мөлшерін Зейкенов айтқан жоқ. Өйткені келісім сондай.

Ақсулық жігітті Ресей мен Еуропаға шақырып жатыр. Бірақ ол үйде жақсы екенін айтады.

Қазақстандық лейблдерден әлі ұсыныс түспепті. Алайда бірнеше күн бұрын әнші Наzима хабарласқан екен.

"Әлі ойланып жүрмін, тректі тыңдаған жоқпын ", - деді Иманбек.

sputniknews.kz