Сорлы жүрек үнсіз ғана жылады

Өмір сондай - сүрінесің, тұрасың,

Қиялдайсың, түрлі мақсат құрасың.

Армандарың желге ұшқан кезінде,

Басыңды кеп түрлі жерге ұрасың.

Өмір сондай - өз дегенін істетер,

Шалыс бассаң, бармағыңды тістетер.

Өмір өзі тəрбиелеп адамды,

Кейде əлсіз, ал кей кезде күшті етер.

Өмір сондай - армандаумен келесің,

Бос қиялдың жетегіне ересің.

Бостан-босқа ұрынғаннан пайда жоқ,

Маңдайыңа жазылғанды көресің.

Өмір өзі ақ-қарадан тұрады,

Шешілмейтін тым көп екен сұрағы.

Өтіп жатқан өміріме бір налып,

Сорлы жүрек үнсіз ғана жылады.