Пхеньян: Вашингтон мен Сеул денуклеаризация бойынша ештеңе істеп отырған жоқ

КХДР 20 айдан астам уақыт бойы ядролық қару мен құрлықаралық баллистикалық зымырандарды сынақтан өткізуден бас тартып келген.

БҰҰ жанындағы КХДР-ның тұрақты өкілі Ким Сон Бас ассамблея отырысында сөйлеген сөзінде «Корея түбегінің денуклеаризациясындағы прогрестің жоқтығына АҚШ пен Оңтүстік Корея кінәлі» деп мәлімдеді. Бұл туралы AFP агенттігі хабарлайды.

Ким Сонның айтуынша, КХДР ядролық қаруды сынаудан және құрлықаралық баллистикалық зымырандарды ұшырудан 20 айдан астам уақыт бойы бас тартып келді. Бейбітшілік пен тұрақтылыққа қол жеткізуге ұмтылысын көрсетті, алайда оған «Америка Құрама Штаттарының саяси және әскери арандатулары» кедергі келтіруде.

Оңтүстік Кореяға келетін болсақ, тұрақты өкілдің айтуынша, ол «екі майданда ойнап жүр», АҚШ-пен бірлескен «КХДР-ға бағытталған» әскери жаттығуларды ұйымдастыра отырып, бейбіт бастамалармен сөз сөйлеуді жалғастырып жүр.

5 қазан күні Швецияда АҚШ пен КХДР делегациялары арасында ядролық келіссөздер басталған. Сол күні КХДР делегациясы келіссөздердің сәтсіздігі туралы мәлімдеді. АҚШ-та Стокгольм маңындағы тараптардың сегіз сағаттық пікірталасы «жақсы» болғанын жеткізді. Вашингтон келесі кездесуді екі аптадан кейін өткізуді ұсынған болатын.