ЭКО-ны қалай тегін жасатуға болады?

Бүгінде Қазақстанда 11 мыңнан астам әйел бедеулікке шалдыққан. Әлеуметтік медициналық сақтандыру қоры ЭКО-ны қалай тегін жасатуға болатынын айтты. Бұл туралы Bugin.kz платформасы хабарлайды.

ӘМСҚ 2018 жылдан бастап ЭКО-ны қаржыландырып келеді. 2018-2019 жылдары 902 цикл, 2020 жылы – 1105 цикл өткізілді. Ал  2021 жылы қаржыландыру көлемі ұлғайды. Қаржы 6,2 миллиард теңгені құрап, 7 мың цикл жоспарланып отыр.

Тегін ЭКО-ны кім жасата алады?

Бедеулікті емдеу мүмкін емес. Ал ЭКО сәби сүюге жәрдемдеседі. ЭКО жасату үшін ерлі-зайыпты болу шарт емес. Тек ер мен әйелдің арасында жазбаша келісім болуы қажет. Сонымен қатар, Қазақстан азаматы болуы мен денсаулық сақтау министрлігі бекіткен жас параметрлеріне (18-ден 42 жасқа дейін) сай болу керек.

ЭКО жасата алмайтын жайттар да қарастырылған: жатырдың туа біткен немесе пайда болған ауытқулары және психикалық бұзылулар, аналық безде ісіктің болуы, жедел қабыну аурулары мен онкологиялық аурулар.

ЭКО-ға қалай тегін жолдама аламыз?

ЭКО-ға тегін жолдама алу үшін алдымен тіркелген жеріңіз бойынша емханаға жүгініңіз. Емхана мамандары сізді бедеулігі анықталған науқастардың электрондық базасына тіркейді. 12 ай ішінде сіздің құжаттарыңыз жоғары технологиялық медициналық қызметтер жөніндегі жергіліктік комиссияға жіберіледі. Оң шешім қабылданған жағдайда  науқас "емдеуге жатқызу бюросы" порталында тіркеледі. Осылайша, жасанды ұрықтандыруға дайындық басталады. Ескере кететін жайт өзіңізге қолайлы кез келген аурухананы таңдау мүмкіндігі бар. 

МӘМС жүйесінде ЭКО-ның циклдің бағдарламасы қарастырылған:

• суперовуляцияны ынталандыру;
• аналық бездердің трансвагинальды пункциясы;
• мұздатылған (витрификацияланған) эмбриондарды тасымалдауды қоса алғанда, жұмыртқа жасушас алу;
• Жүктілікті диагностикалау ұрықтандырудан 12-14 күн өткен соң жүргізіледі. Ультрадыбыстық зерттеу 21-ші күні тағайындалады.

Сәби сүю ықтималдылығы қандай?

ДДСҰ мәліметтері бойынша, жасанды ұрықтанудың 45-60 пайызы оң нәтиже көрсеткен.

"ЭКО жасату тиімділігі елімізде орта есеппен 15 пайыздан 42 пайызға  өсті. Бала туу фактісі бойынша емдеу тиімділігінің көрсеткіші (take baby home) 30 пайызға жетті. Бұл үздік еуропалық клиникалардың көрсеткішіне сәйкес келеді" деді ӘМСҚ.

Қытай ғалымдары коронавирус әйелдерде бедеулікке әкелуі мүмкін деген қорытындыға келді. Зерттеу нәтижесінде, вирус аналық без бен жатырды, әйелдің мүшелерін зақымдайды.