Тойламай-ақ қояйын...

Басынан талай қиын-қыстау күндерді өткерген, "тар жол, тайғақ кешулерден" өткен еңселі тәуелсіз қазақ елін әлем таниды. Артымызға көз салып, тарих беттерін парақтар болсақ, сан түрлі соқпақтар мен қияларды көреміз. Сол қиялардан "мың өліп, мың тірілген" "Мәңгілік ел" болуға ұмтылған Алаш жұртын көремін. 

"Елінен безген ер болмас, көлінен безген қаз болмас" дегендей қасіреттен де, нәубетті аштық, оба, індет, жаудың ойранынан да қасқайып тұрып елін күзеткен арыстар қаншама екен? Қай ғасырды алып қарасақ та, қилы-қилы кезеңдер болған. Сондай қилы кезеңнің бірі, дәл қазір менің қайсар қазағымның басынан өтіп жатыр. 

Күллі әлемді шарпыған індет менің елімді де айналып өтпеді. Індеттің беті күннен-күнге үдеп бара жатқаны да өтірік емес. Әлеуметтік желіден күнде тың ақпараттармен қанығып отырмыз. Күндіз күлкіден, түнде ұйқыдан айрылдық десем, артық айтқандық емес. "Covid-19" деген атпен әйгілі болған бұл дерт адамзатты жалмап бара жатыр. Қоғамның, мемлекеттің басты капиталы адам десек, міне, сол басты құндылығымыздың өмірін қыршын етіп бара жатыр. Көзімізден жас емес, қан тамуда. Күндіз-түні ел амандығын тілейтін халге жеттік...

Деректерге сүйенсек, бұл індет ел басына туған бірінші жағдай емес екенін білеміз. "Қара індет" деген атпен танымал болған тарихта өшпес ізі бар індетті білеміз. Бұл індеттен оңалу үшін Еуропа халықтарына 150 жылдай уақыт керек болған екен. Қазақ тарихында да шешек, шума, оба, сүзек, безгек сияқты жұқпалы індеттер болғанын тарихтан оқыдық. Дегенмен, бұл қиындықты Алашым жеңе білді. Әрине, шығын, адам шығыны өте көп болды, дегенмен елдігін, бірлігін сақтап қалды. Алаш зиялыларының індет туралы 30-ға жуық кітап жазғанын да білеміз. Сол үшін олар қуғын-сүргінге де ұшырады емес пе?

Осындай індет кезінде де халқымыз карантин шараларын енгізген. Оның ең бастысы - оқшаулану. Мысалы, қарапайым ғана қызылша ауруымен ауырса, 40 күн оқшаулаған. Науқас шыққан ауыл екінші ауылмен қатынаспаған екен. Қарап отырсақ, дәл осы жағдай қазір басымыздан өтіп жатыр. Үкімет халық игілігі үшін карантин шараларын осы күнге дейін де енгізіп жатыр. Оның ең бастысы - оқшаулану. Осы талаптарды қаншалықты орындап жүрміз? Жасыратыны жоқ, карантин талаптарын әлі де орындамай, арқаны кеңге салып жүргендер баршылық. Ата-бабамыз: "Бірінші байлық-денсаулық" деп, ұрпағына текке аманат етпегеніне көзіміз жетіп жатыр. Дәл қазір басқа байлықтың бәрі жайына қалып, ел амандығын, денсаулық тілейтін күйге жеттік. Медицинасы мықты алпауыт елдер бұл індетті әзер жеңіп жатыр. Ал біздегі тапшылық дәрігерлер, дәрілер, өкпе тыныс құрылғылары. Десек те, ел іші - алтын бесік, қалталы, елім дейтін азаматтар бар көмегін көрсетіп жатыр. "Демі бардың, елі бар", - дегендей, бұл індеттің де емі бар екеніне әлі күнге дейін сенемін. Сол сенім іске асу үшін бізге, қазақ еліне бірлік, татулық, қамқорлық ауадай қажет екенін түсінемін. Айғай-шуға берілмей, әрбір адам өзін сабырмен ұстай білсе, бұл дерттің де іргесі аулақтайды деп білемін.  Ойымды жүрегімнің түкпірінен шыққан балаң жырларымен түйіндесем деймін:

        Естімей-ақ қояйын қоңыраудың сыңғырын,

        Көрмей-ақ та қояйын таңғы қиыққан күн нұрын

        Көрсем болды ел аман, тыныштығын жұртымның,

        Көрсем болды Алты алаш қуанышын ұлтымның.

        Тойламай-ақ қояйын мектеп бітіру құрметін, 

        Амандығын тілеу ғана менің басты міндетім. 

        Талай қыршын ғұмырды қиып кеткен мезгілсіз, 

        О, Жаратқан, тоқтатшы келген мынау індетін.

        Кимей-ақ та қояйын әдемі, әсем көйлекті,

        Мынау қайғы дәл бүгін жүрегімді сөйлетті.

        Елім аман болсын деп, дұға етемін күн сайын,

        Көзден емес, жанымның мөлдір жасы селдетті. 

        Елім аман болсыншы, таңым күліп атсыншы,

        Пәле-қале қарасы мәңгі енді батсыншы.

        Індет кетіп елімнен, бар тіршілік жаңарып,

        Тілегім сол: думанды тойын тойлап жатсыншы.