Британ университеті Алматыда өз филиалын ашады

Британдық Де Монфорт университеті 1 шілдеге дейін Алматыда өз филиалын ашатынын мәлімдеді. Бұл туралы Bugin.kz платформасы хабарлайды. 

Оқу барысы толығымен ағылшын тілінде өтеді. Академиялық құрамның 70%-ы шетел азаматтарынан құралады деп жоспарланған.

Сондай-ақ, профессорлық-оқытушылар құрамының 40%-ы – докторлық дәрежеге, ал 60%-ы магистрлік біліктілікке ие мамандардан тұрады. Студенттерге Ұлыбританияның Лестер қаласындағы Де Монфорт университетінің басты кампусында бір жыл оқуға мүмкіндік беріледі.

Филиалдың ашық веб-сайтында үкіметтің тиісті қаулысы жарияланды. Құжатта көрсетілген мәлімет бойынша бұл филиал Де Монфорт университеті мен EdPeritus арасындағы франчайзингтік келісім негізінде ашылады.

2021-2022 жылғы оқу жылында үміткерлерді келесі мамандықтарға қабылдау жоспарланды: бухгалтерлік есеп және аудит (бакалавриат), бизнес және менеджмент (бакалавриат), маркетинг (бакалавриат), құқық (бакалавриат), экономика (бакалавр дәрежесі), іскери әкімшілік (магистратура), құқық (магистр дәрежесі), халықаралық сауда құқығы (магистр дәрежесі).

ЮНЕСКО-ның статистикасы бойынша жыл сайын 83,5 мың қазақстандық шетелде оқиды. «Болашақ» бағдарламасы стипендиаттарын дайындауда Ұлыбритания жетекші орын алады (14 мың стипендиаттың 6-ы).

«Студенттердің шет елдерге кетуі Қазақстанның экономикасына кері әсер етеді. Мысалы, Ұлыбританияда бір студентке шаққандағы шығын 40 мың  долларға дейін жетеді (оқу ақысы, бөлме мен тамақтану, оқу материалдарын сатып алу, медициналық сақтандыру, рейстер және қалалық көлік). Осылайша, шамамен 1300 студент оқитын бір ғана Ұлыбританияда өмір сүру қазақстандықтарға жыл сайын шамамен 50 миллион долларды құрайды» делінген қор мәліметтерінде.

Демек, британдық университеттің Қазақстанда филиал ашуы жастардың шетелге кету проблемасын шешуге және қазақстандықтардың қаржылық ауыртпалығын азайтуға мүмкіндік береді (филиалда оқыту құны жылына 10-12 мың доллар көлемінде жоспарланған).

Деректерде АҚШ, Ұлыбритания, Франция және Австралиядағы беделді университеттердің шетелдік филиал немесе халықаралық кампус ашу үрдісі пандемия аясында пайда болғаны атап көрсетілген.

Қазақстандағы  халықаралық университеттер қатарына: Яссауи атындағы Қазақ-Түрік университеті (Түркия), Қазақ-Герман университеті (Германия), сонымен қатар Ломоносов атындағы  Мәскеу мемлекеттік университетінің филиалы (Ресей) жатады.

Үкімет британдық филиал Орталық Азия, Үндістан, Ресей, Қытай, Моңғолия, Пәкістан, Ауғанстан және Түркиядан "студенттерді тартады" деп санайды.

Университет 1870 жылы Лестер өнер мектебі болып құрылған. 1992 жылы ресми университет мәртебесін алды және De Montfort University (DMU) болып өзгертілді. Лестер Университеті Times Higher Education (THE) 2020 нәтижесі бойынша әлемдегі ең үздік 150 жас университеттер қатарына енді.