Семейде ең үлкен мешіт ашылды

Семей қаласында Абай Құнанбайұлы атындағы мешіт ашылды

Авторларды қолдау орталығы

[email protected]

Әз-Наурыз мейрамына орай Семейде «Абай Құнанбайұлы» мешіті жұртшылыққа есік ашты. Салтанатты жиынға қала әкімі Нұрымбет Аманұлы, Бас мүфти Наурызбай қажы мен зиялы қауым өкілдері арнайы қатысты. Мешіт табалдырығын алғаш аттаған қонақтар Мұхтар Шаханов, Асанәлі Әшімов, Алтынбек Қоразбаев, Жүрсін Ерман, Секен Тұрысбеков, Нұрділдә Ораздар болды. Ауа-райының қолайсыздығына қарамастан жиналған қауымның саны көп болды.

  • «Бүгін – тарихи күн. Абай елі мұны көп күтті. Осы мешіттің ашылуын біз де ұзақ күттік. Міне, ел Тәуелсіздігінің 30 жылдығы қарсаңында барша Семей халқының игілігіне беріліп отыр», -  деді сөзінде Бас мүфти.

Ұзақ деп айтуына да негіз бар. Мешіттің бой көтерілуіне 2008 жылы жер бөлінген болатын. Әуелі түрік инвесторлары құрылысты бастағанмен аяқталмай қалды. 2018 жылы «ASSYLTAS» қоғамдық қорының директоры Дулат Тастекеев істі өз жауапкершілігіне алды. Оның айтуынша,  құрылысты өткен жылдың тамыз айында Абайдың 175 жылдығына орай аяқтау жоспарланған. Алайда пандемиялық факторлар жұмысты кешеуілдеткен.

  • «Мешіт құрылысы екі жарым жыл жүргізілді. Біз құрылысты алғаш бастаған кезде оны екі жыл ішінде аяқтап, 2020 жылдың тамызында, хакім мерейтойына орай ашуды жоспарладық. Алайда, әлемдік пандемия жұмысқа әсер етпей қоймады. Сондықтан құрылыс тағы жарты жылға созылды. Соған қарамастан, біз басталған істі соңына дейін жеткізе алдық. Күн мен түн теңелген қасиетті күні сіздермен бірлесіп мешітті салтанатты түрде ашып жатырмыз. Бұл мен үшін және бүкіл Семей үшін үлкен қуаныш. Өйткені семейліктер бұл мешіттің ашылуын он жылдан астам уақыт күтті. Осы жылдар ішінде талай мердігер өзгерді. Ал бізді мешіттің тағдыры алаңдатпай қоймады. Семейдің дамуына өз үлесімізді қосқанымызға өте қуаныштымыз», - дейді Дулат Тастекеев.

Мешітте бір уақытта 2500 адам намаз оқи алады. Алтын жалатылған мұнаралардың биіктігі 37 метр. Сондай-ақ 500 автокөлікке арналған тұрақ қарастырылған.  Ал сыртқы абаттандыруды Түркістан облысы өз жауапкершілігіне алды. Мешіт бұдан былай кәсіпкердің меншігінде емес. Мұны да кәсіпкер сөзге тиек етті:

  • «Бұл Алланың үйі, ешкімнің жеке меншігі емес, бүгіннен  бастап толықтай Қазақстан Мұсылмандар Діни Басқармасының басқару мен құзырына өтеді. Бұл бір әулеттің қолдауымен салынғанымен барша жұртқа ортақ игілік».

Айта кетейік, Абай Құнанбайұлы мешіті енді  қаладағы ең үлкен мешіт саналады. Бүгінде Семейде он беске жуық мешіт бар.