Bugin

Алматыда сотталғандар қар тазалайтын болады

Авторларды қолдау орталығы

mediabugin@gmail.com

Биыл еліміздің барлық өңірінде шамадан тыс қар жауды. Алматы қаласында да қалың қар жауып, сарышұнақ аяз басталды.

Оңтүстіктің жанға жайлы ауа райына үйренген қала тұрғындары үшін қатал қыс айтарлықтай қиындық тудырып жатыр. Сонымен қатар қалың қар жол қозғалысына да кедергі келтірді, деп хабарлайды Bugin.kz порталы Azattyq Rýhy сайтына сілтеме жасап.

«Алматы қаласының көшелерін қардан тазалауға коммуналдық қызметкерлермен бірге сотталғандар да бір кісідей жұмылып жатыр. Алматы қаласы Әуезов аудандық пробация қызметінің бақылауындағы 10 сотталған және Наурызбай ауданынан 8 сотталған өздеріне бекітілген жұмыс учаскелерін тазалауға кірісті», - деп хабарлайды Алматы қаласы ҚАЖД баспасөз  қызметі.

Қала әкімдігінің коммуналдық қызмет мамандарымен бірге қар тазалауға шыққандар - ҚР қылмыстық кодексінің 44-бабы бойынша сотталғандар. Бас бостандығын шектеу сотталған адамның тұрғылықты жері бойынша қоғамнан оқшауланбай өтеледі. Мәжбүрлі еңбекті жергілікті атқарушы органдар қоғамдық орындарда ұйымдастырады. Тұрақты жұмыс орны бар немесе оқып жүрген сотталғандар, кәмелетке толмағандар, жүктi әйелдер, үш жасқа дейiнгi жас балалары бар сотталғандар, сондай-ақ зейнет жасындағы сотталғандар мәжбүрлі еңбекке тартылмайды.

Қала көшелерін қардан тазалау барысында пробация қызметкерлері сотталғандарға бас бостандығын шектеу жазасын заңға сәйкес өтеудің жеңілдіктері мен жаза өтеу тәртібін бұзудың зардаптарын да кеңінен түсіндіріп жатыр.