Украинадағы соғыста 47 мыңға жуық ресейлік қаза тапты

Украинадағы соғыста 47 мыңға жуық ресейлік қаза тапты. Зардап шеккендердің жалпы саны, ауыр жараланғандармен бірге санағанда, 125 мың адам болуы мүмкін.

Мұндай зерттеуді Meduza, Mediazona және Дмитрий Кобак жүргізді. Авторлар зерттеуді толық деп санауға болмайтынын атап өтті, өйткені есептеулер ішінара хабар-ошарсыз кеткендерді қамтығанымен, тұтқындар мен "ЛНР" және "ДНР" деп аталатын сарбаздарды қамтымайды.

"2022 жылы соғыста 50 жасқа дейінгі 25 000-ға жуық ер адам, ал 2023 жылдың 27 мамырына қарай 47 000-ға жуық адам қаза тапты. Нақтырақ айтсақ, қаза тапқандар саны 95% ықтималдықпен 40 000 мен 55 000 арасында болады" делінген зерттеуде.

Бұл - Ауғанстандағы 10 жылға созылған соғыс кезіндегі Кеңес Одағының шығынынан үш есе, ал 1994-1996 жылдардағы бірінші шешен жорығы кезіндегі Ресей федералдық әскерлерінің шығынынан тоғыз есе көп.

Украина Қарулы Күштерінің Бас штабы таңертеңгі есебінде соғыс басынан бері 234 480 ресейлік сарбаздың қаза тапқанын хабарлады.