Қызылорда да адам бойжеткеннен жыныстық қатынасқа түсуді талап еткен

Қызылордада әйелді масқаралайтын мәліметтерді жария етемін деп бопсалап, еркінен тыс жыныстық қатынас талап еткен 28 жастағы адам ұсталды.

Полицияға 22 жастағы азаматша жүгінді. Ол танысының өзін масқаралайтын мәліметтерді жария етемін деп қорқытып, бопсалау арқылы еркінен тыс жыныстық қатынас талап ететінін айтқан.

Аталған дерек бойынша Қызылорда облысы Полиция департаментінің Ұйымдасқан қылмысқа күрес басқармасы және Арал аудандық полиция бөлімі қызметкерлері бірлесіп жедел іздестіру жұмыстарын жүргізді. Нәтижесінде Қызылорда облысында тұратын 28 жастағы тұрғын ұсталды.

"Күдіктіге қатысты ҚР Қылмыстық кодексінің 194-бабы сотқа дейінгі тергеп-тексеру әрекеттері жүргізілуде. Онда қорқытып алушылық, яғни күш қолдану не бөтеннің мүлкін жою немесе бүлдiру қатерін төндіріп, сол сияқты жәбiрленушiнi немесе оның жақындарын масқаралайтын мәлiметтердi не жариялануы жәбiрленушiнiң немесе оның жақындарының мүдделерiне елеулі зиян келтiруi мүмкiн өзге де мәлiметтердi тарату қатерін төндіріп бөтеннің мүлкін немесе мүлiкке құқықты беруді немесе мүлiктiк сипаттағы басқа да әрекеттер жасауды талап ету жағдайы көрсетілген. Күдікті уақытша ұстау изоляторына қамалды", - деп мәлім етті Қызылорда облыстық Полиция департаментінен.

Еске салайық, кеше Қызылорда да күйеуінің қолынан қаза тапқан келіншек туралы тың дерек шыққанын хабарлаған едік.